Den un forma di yuda y duna back na nos comunidad, SETAR a organisa e “End Of Year Clean-Up” durante e weekend cu a pasa. A pone varios container na diferente localidad di Aruba, pa asina duna e oportunidad na e comunidad pa haci nan cura y bario limpi. Cu e proyecto aki SETAR kier a conscientisa tambe, tur cuidadano pa mira e importancia di mantene nan cura limpi y pa no laga sushi acumula. Aruba tin hopi sushi, esta sushi di cas y sushi grof cu hopi biaha ta wordo deshaci na areanan ilegal rond di nos isla.
Ya den oranan trempan di diasabra por a mira un presencia grandi di pick-up y autonan yena cu sushi, unda hendenan den tur bario a probecha pa limpia nan cas y nan cura. Nos ta considera e weekend aki uno exitoso, mirando e comentarionan positivo cu SETAR a ricibi pa e iniciativa aki. E necesidad di pone containernan den barionan pa tira sushi ta algo existente y nos ta contento cu e iniciativa aki a contribui na yuda tene nos Aruba mas limpi.
