SETAR durante e pandemia di Covid-19 a tuma e reto pa desaroya e Aruba Health App di forma agil. Un aplicacion cu a contribui grandemente na maneha e pandemia bou nos habitantenan y bishitantenan.
Aña pasa november, SETAR hunto Minister di Salubridad, Sr. Dangui Oduber, y AZV a firma un acuerdo den forma di partnership pa sigui desaroya e Aruba Health App na e siguiente nivel den tecnologia.
Despues di lunanan di trabou y colaboracion, diahuebs mainta a lansa e version nobo di e Aruba Health App cu e slogan “Mi Salud den Mi Man”. Un proyecto grandi pa SETAR, unda cu durante e ultimo lunanan nos coleganan di SETAR tabata encarga cu e parti tecnico di e aplicacion.
E version nobo di e Aruba Health App ta modernisa e manera con bo ta pidi y wak bo informacion medico facilmente y sigur cu funcionalidadnan manera MiCita, MiAsistencia, MiDokter y MiRemedi. Via di e funcionalidadnan aki bo por traha cita via e aplicacion cu bo dokter di cas, check bo sintomanan via self-triage, wak bo recetanan, controla bo citanan y mira bo historia di vacuna. Esaki ta e prome fase di e version nobo di e aplicacion. Den e proximo lunanan lo sigui expande e funcionalidadnan di e Aruba Health App.
Download e Aruba Health App y registra pa tin tur bo necesidadnan di salud den un solo aplicacion. E aplicacion ta completamente gratis y obtenibel via App Store y Play Store.
SETAR, como nos compania nacional di telecomunicacion, ta sumamente orguyoso di por aporta por medio di tecnologianan innovativo na e vision di Aruba Health App, esta engrandece accesibilidad, calidad y eficiencia di servicionan di cuido medico na Aruba.
