SETAR, e compania cu ta ofrece tur servicio y producto den telecomunicacion na Aruba a lansa un website completamente nobo.
E website ta den 2 idioma: Papiamento y Ingles. E ta bin cu un diseño full nobo y ta ofrece acceso rapido y facil na informacion y tur locual SETAR tin di ofrece. E ta reparti den 3 parti pa facilidad di e diferente clientenan: Residencial, Business y Visitors. (Pa esnan cu ta biba aki na Aruba, esnan di Comercio y e bishitante y turistanan).
Den e website nobo di SETAR e cliente por scohe modelo di celular y e pakete cu e ta desea mientras por calcula e prijsnan di biaha. Tambe por mira si SETAR tin e modelo di celular den stock e momento ey. Tambe por haci mescos cu tanto servicio di Internet como Cable TV.
Otro aspecto interesante pa e cliente cu no tin hopi tempo ta e posibilidad di haci un cita “online” pa un ora specifico acorda pa bishita nos SETAR STORE. Di e manera aki ta kita e tempo pa warda pa un beurt. E tin e cita na e ora specifico. Actualmente esaki ta citanan pa training y tambe ayudo na nos helpdesk na SETAR Store.
E website tin un diseño mas fresco y simpel, cu ta mehora e funcionalidad y ta enfoka mas riba un contenido mas amplio. "Nos ta hopi contento pa lansa nos website nobo y cu ta contene informacion pa e cliente, partner y media pa asina por compronde e filosofia di SETAR “creando conexion”.”
"Nos ta pensa cu e website aki por brinda nos clientenan un experencia nobo mientras cu nos compania SETAR ta sigui crece y mantene nos presencia riba e mercado di Aruba y surpasa continuamente expectativa di nos clientenan.”, asina Director di SETAR Sr. Roland Croes a expresa.
SETAR su website awor tin e “look” y “feel” nobo cu SETAR lo keda “update” riba un base regular cu noticia of productonan cu lansa, actividadnan comercial, metanan alcansa, eventonan special y otro informacion importante.
Un y tur ta keda cordialmente invita pa bai riba e website nobo di SETAR y explora kico tur ta nobo y kico tur ta posibel.
