Durante un conferencia di prensa recientemente, e team di ATECH hunto cu Setar, CMB y ATA e main sponsornan, a anuncia e gran conferencia di ATECH cu lo tuma lugar dianan 15, 16 y 17 di September proximo na Hilton.
Aña pasa, a trece mas di 20 orador internacional y e conferencia a conta cu asistencia di 450 persona. Ta premira cu 2016 lo bira mas grandi.
ATECH su meta ta pa pone riba mapa, Aruba como e paraiso den inovacion y tecnologia den Caribe. E conferencia di ATECH ta enfoca riba e ultimo den mundo di Technologia, Marketing, Branding, Funding, Investment y mucho mas!
E aña aki mescos cu aña pasa, lo tin oportunidad di un Demo pitch day na unda diferente compania ta purba bende nan concepto di cuminsa un negoshi.
Tin 12 finalista cu a keda selecta for di rond di mundo entre un record di mas cu 150 inscirpcion for di mas di 100 pais rond di mundo. E 12 finalistanan aki lo haci nan presentacion na ATECH y e ganador lo gana $20.000,- pa asina por inverti den nan startup.
SETAR, CMB y ATA ta sumamente contento di por ta forma parti di un conferencia manera ATECH 2016 na unda tin inovacion, creatividad y ideanan fresco ta keda presenta fomentando asina mas resultadonan positivo den tecnología moderno.
Riba e potret por mira e representantenan di CMB, SETAR y ATA respectivamente na e conferencia di prensa.
