Durante e conferencia di prensa teni door di Stichting MUSICA sra. Shahaira Labad hefe di mercadeo di SETAR a expresa e satisfacción cu den un tempo hopi cortico después di Carnaval, ya a ricibi e relato financiero di e Aruba Caiso & Soca Monarch 2017 y cu e bon noticia cu ta paga tur debe. SETAR desde e inicio a sostene Stichting MUSICA pa motibo cu SETAR ta kere den nos propio musiconan y tambe den e competencia pa e fiesta di mas grandi di Aruba cu ta Aruba su Carnaval.
Di berdad ta mira cu MUSICA a traha duro pa e resultado excelente aki.
Sra. Edwina Werleman, Presidente di Stichting MUSICA a gradici nan main partner den e siguiente manera: “SETAR ta un compania briyante cu a duna e festival su respaldo desde su inicio, desde cu Stichting MUSICA a wordu funda. SETAR no solamente ta brinda e stichting apoyo financiero, pero tambe ta conseha y motiva e organisacion y a keda yuda den bon y mal temporada”.
MUSICA a conta cu respaldo di otro partnernan valioso pa Aruba Caiso & Soca Monarch cu a para firme tras di e festival, incluyendo Aruba Bank NV, Aruba Tourism Authority, Departamento di Cultura, Tropical Bottling Company, Aruba Airport Authority, K&G, Johnson Enterprises, Ecotech, Atco y King Ocean.
Otro colaboradornan cu a haci Aruba Caiso & Soca Monarch 2017 posibel; PEG Entertainment, KPA, Rode Kruis, DTI, Brandweer, Insam y tur otro instancia y sin falta Minister De Meza y Minister President Eman pa nan sosten.
Stichting MUSICA a expresa tambe cu tin un gran aprecio pa tur medio di prensa, noticiero y locutor cu a sa di sostene tur actividad di e organisacion, en especial e Aruba Caiso & Soca Monarch. Stichting MUSICA ta reconoce e trabou importante y intensivo di Plus Acounting, cual a supervisa y traha hunto cu e organisacion durante tur 4 anochi di festival y a cera e “Financial Report 2017”.
Na final a gradici henter e pueblo di Aruba, cu a asisti e festival masalmente, dunando respaldo na Aruba Caiso & Soca Monarch y tambe na banda, musico y cantantenan preferi durante tur 4 anochi di e festival.
Stichting MUSICA a informa cu nan lo presenta e calendario nobo pa continua aña 2017 otro luna durante nan reunion dia 13 di mei 2017.
Riba e potret por mira momento cu Sra. Labad di SETAR ta hiba palabra y momento cu e Stichting MUSICA ta mustra e relato financiero 2017 hunto cu demás miembronan di MUSICA, e accountant y representantenan di sponsornan ATA y SETAR cu tabata presente.
