En conexión cu e celebración di dia di labor, STT su miembronan di FSTT y tambe miembronan di PEVESA cu ta e club di actividad a sali dia 26 di april 2017 cu e lema: “Nos ta Un” pa 5 scol y na 3 cas di anciano na unda nan a duna regalo of bolo di parti di e sindicato di trahadornan den telecomunicación di Aruba.
Esaki a sosode como algo inespera y di sorpresa pa e scolnan y e casnan di anciano.
E scolnan Colegion Hilario Angela, Kukwisa School, Maria School, Maria Gorretti School y Colegio Conrado Coronel,a ricibi materialnan cu nan por usa pa hunga durante deporte of ora liber na e scol den forma di 3 bala.
Un bala pa hunga basket, un bala pa hunga volley y un bala pa hunga trefball. E balanan aki ta simbólicamente duna un estimulo pa e studiantenan hunga y siña traha den equipo of grupo. “Como empleadonan di SETAR ta convenci cu únicamente door di traha hunto por hiba nos isla dilanti”, asina Clem Van Heyningen di STT a expresa.
E casnan di Anciano cu a bishita tabata esun di Palisiaweg na San Nicolas, na Savaneta y na Playa. Tur 3 a haya un bolo grandísimo pa e grandinan.
Presidente di STT Sr. Albert Franken ta masha satisfecho con e miembronan, empleadonan di SETAR a bin cu tremendo idea pa celebra Dia di Labor 2017 den un manera asina positivo y di duna bek na e comunidad. Y tambe e manera di ta forma un unidad asina energetico.
“Nos kier a gradici e comunidad y nos miembronan pa e sostén di Semper”, asina Franken a expresa.
Riba e potretnan por mira algun momento na unda miembronan di STT ta haci entrega di e regalonan y bolo.
