Oranjestad - E proyecto di cambia conexion di DSL pa Cablenet na tur cas na Aruba ta drentando su fase final. Mayoria cliente di SETAR a haci e cambio caba y ta gosando di e speednan di mas halto y otro beneficionan cu Cablenet ta trece cune.

SETAR a aserca su clientenan cu tin DSL na cas pa wak si nan tabata desea di switch nan servicio di DSL pa uno di Cablenet. Esaki pa via telefonico y si no por a haya contacto cu nan por medio di un carta.“E motibo principal di esaki ta cu e tecnologia di DSL, Internet via conexion di telefoon fiho, tin limitacion tecnico pa por yega speednan mas halto. Via di Cablenet, Internet via conexion di Cable, si esaki ta posibel.”, asina Arthur Ruiz, representante di e departamento di mercadeo di SETAR a splica.

Ela sigui bisa cu pa por beneficia di speednan halto y gosa di ful e potencial di nos red ta necesario pa cambia e conexion actual di DSL pa Cablenet.
Den e proyecto aki, SETAR a cambia e conexion actual di DSL pa Cablenet sin cobra e gasto di instalacion di Afl.175,- pa clientenan cu dicidi di haci e cambio prome cu dia 1 di oktober 2016. Esaki basa riba un contract di 2 aña.

Loke ta importante pa tene na cuenta cu ne si ta cu pa por cambia e servicio di DSL pa Cablenet ta necesario pa e cliente tin e servicio di Cable TV como cu parti di e infrastructura ey ta uza pa por ofrece Cablenet.

SETAR ta premira cu tecnologia lo sigui desaroya y avansa y pa evita cu den futuro un cliente mester haci gasto pa cambia su modem den caso cu esaki daña of si mester cambia esaki pa uno mas moderno, SETAR a cambia su modelo di e servicio aki.
Clientenan di SETAR no tin mester di cumpra e modem mas den caso di Cablenet. SETAR lo duna e cliente un modem nobo den “bruikleen” pa duracion cu e servicio di Internet di e cliente ta activo. E modem lo keda propiedad di SETAR. SETAR ta cobra un biaha un deposito di Afl. 25,- pa e Cable modem. Ora cu haci e cambio pa Cablenet lo cobra esaki via e siguiente cobranza pa asina por haya un speed mas halto di Internet na cas sin hopi complicacion.

Esaki tabata un oferta pa e clientenan cu tabata desea di haya e servicio di Cablenet y hunto cune mas speed. N’e momento aki SETAR ta anuncia e parti final di e proyecto y e oferta. E ultimo dia cu clientenan por haci uzo di e oferta aki lo ta dia 1 di oktober 2016. Despues di e fecha aki lo no ta posibel mas pa haci uzo di e oferta y e gastonan di instalación lo keda e ora pa e cliente mes.

Clientenan cu ainda no a reacciona por pasa na cualkier Teleshop di SETAR of por yama 525-1702 di dialuna pa diasabra entre 9.00 am pa 7.00 pm.