Tabata mainta yena cu alegria, baile y sorpresa ora cu St. Paulus School a ricibi su premio como ganador di e SETAR Dance Campaign. Esaki tabata un competencia di video den cual por a participa cu diferente movimiento cu baile y show riba e tononan di e jingle cu SETAR a traha specialmente pa temporada di Carnaval 63 di Aruba.
SETAR a lansa e campaña di competencia aki “SETAR Dance”, unda cu participantenan por a upload un video di nan mes of cu nan grupo bailando riba e ritmo carnavalesco di SETAR su Jingle. Di tur e videonan cu a keda “posted” riba e Facebook page di SETAR Dance, tabata tin uno cu a captura e atencion di un y tur. Esaki tabata e video di St. Paulus cu a ricibi aproximadamente 100 mil views riba Facebook y a keda comparti miles di biaha riba rednan social.
Recientemente den oranan di mainta SETAR a haci bishita na St. Paulus School pa haci e entrega di e premio di e SETAR Dance campaign. Cu hopi alegria y animo e docentenan di St. Paulus a ricibi e cheque di Afl. 5000 cu sigur lo yuda e School den nan meta di pone airco pa henter e scol. Apart di esaki SETAR a trece cupcake y e sorpresa pa e alumnonan di St. Paulus School cu un presentacion special di Jeon y invitadonan Prim, Freddie y Ritmo Real. Sigur un mainta inolvidabel pa e alumnonan y e team completo di SETAR Dance. Pabien un biaha mas na St. Paulus School ganador absoluto di e SETAR Dance Campaign.
Riba e potretnan por mira e momento cu e cabesante y e docentenan di St. Paulus School a ricibi e cheque di Afl. 5000 for di representantenan di SETAR serando e campaña di SETAR Dance hunto cu Jeon y invitadonan celebrando cu e diferente klasnan.
